ភ្នំពេញ៖ ស្នងការដ្ឋាននគរបាលរាជធានីភ្នំពេញ អំពាវនាវដល់ជនបង្កដែលបើករថយន្តបុកឪពុក កូនប្រុស រងរបួស និងស្លាប់កូនស្រីម្នាក់ នៅផ្លូវ៦០ម៉ែត្រកាលពីយប់ម៉ោង៩កន្លះ ថ្ងៃទី១១ ខែកុម្ភៈ ឆ្នាំ២០២៤ ចូលខ្លួនមកសារភាព ខណៈអាជ្ញាធរកំពុងស្វែងរកជនបង្កយកមកអនុវត្តតាមនីតិវិធី។

នៅមុនពេលកើតឡើង ឪពុកបានជិះម៉ូតូអាគុបស៊េរីចាស់ ដឹកកូនប្រុសស្រី ២នាក់ បម្រុងទៅយកប្រពន្ធចេញពីធ្វើការនៅផ្សារទំនើបអ៊ីអន៣ ពេលធ្វើដំណើរមានរថយន្តមួយគ្រឿងបានបើកមកបុកពីក្រោយម៉ូតូ អូសទាំងម៉ូតូ និងមនុស្សឡើងលើចិញ្ចើមផ្លូវបណ្តាលឱ្យកូនស្រីរងរបួសធ្ងន់ធ្ងរ និងស្លាប់ពេលបញ្ជូនទៅមន្ទីរពេទ្យ ចំណែកឪពុក រងរបួសធ្ងន់ ហើយកូនប្រុសម្នាក់ទៀតរងរបួសមធ្យម។ ក្រោយហេតុការណ៍នេះកើតឡើងភាគីខាងជនបង្កបន្តបើកទៅមុខរត់គេចទៅតែម្តង។

ករណីគ្រោះថ្នាក់ចរាចរណ៍ខាងលើនេះ ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ក៏បានបញ្ជាឱ្យមន្ត្រីជំនាញចុះស្រាវជ្រាវជាបន្ទាន់នៅកន្លែងកើតហេតុនោះដើម្បីប្រមូលភស្ថុតាងក្នុងការតាមស្វែងរករថយន្តបង្កយកមកអនុវត្តតាមនីតិវិធី៕